මහරගම පිළිකා රෝහලේ නවීන පහසුකම්වලින් සමන්විත නව ගොඩනැගිලි සංකීර්ණයේ ඉදිකිරීම් කටයුතු ඊයේ(07) ජනාධිපති ආර්යා ශිරන්ති වික්‍රමසිංහ රාජපක්ෂ මහත්මියගේ ප්‍රධානත්වයෙන් ආරම්භ විය.
මෙරට ප්‍රධාන පිළිකා ප්‍රතිකාරක මධ්‍යස්ථානය වන මහරගම පිළිකා රෝහලේ දැනට නේවාසික රෝගීන් 850ක් පමණ ප්‍රතිකාර ලබන අතර ඉන් දෛනික ප්‍රතිකාර සඳහා රෝගීන් 3000කට අධික සංඛ්‍යාවක් රෝහලට පැමිණෙනු ඇත.
ජනාධිපති ආර්යා ශිරන්ති වික්‍රමසිංහ රාජපක්ෂ මහත්මිය එංගලන්තයේ අහමඩ් තේ සමාගමෙන් කරන ලද ඉල්ලීමේ ප්‍රතිඵලයක් මත එම ආයතනයේ මූල්‍ය දායකත්වයෙන් හා ශ්‍රී ලංකා රජයේ ද අනුග්‍රාහය ඇති ව මෙහි ඉදිකිරීම් කටයුතු සිදු කෙරේ.
ඒ අනුව ඇස්තමේන්තුගත මුදල වන රුපියල් මිලියන 1500ක මුදලින් රුපියල් මිලියන 900ක් අහමඩ් තේ සමාගම විසින් ද ඉතිරි මිලියන 600ක මුදල ජනාධිපති මහින්ද රාජපක්ෂ මහතාගේ උපදෙස් පරිදි ශ්‍රී ලංකා රජයේ අනුග්‍රහය ඇති ව මුදල් හා ක්‍රම සම්පාදන අමාත්‍යාංශය විසින් ද දරනු ලබයි.
මහරගම පිළිකා රෝහලට යාබදව ඉදිකෙරෙන මෙම වාට්ටු සංකීර්ණය ‘රසාවී වෛද්‍ය සංකීර්ණය‘ලෙස නම්කොට තිබේ.
ලොව අති නවීන වෛද්‍ය ප්‍රතිකාර පහසුකම්වලින් සමන්විතව ඉදිකෙරෙන මෙම වාට්ටු සංකීර්ණය මහල් 6කින් සමන්විත වන අතර එකවර රෝගීන් 450කට පමණ නේවාසිකව ප්‍රතිකාර ලබාගැනීමට ද හැකිවනු ඇත.
[බර්ටි රම්යප්‍රියගෙන් උපුටා ගන්න ලද ලිපියකි]
0 අදහස්:
Post a Comment