ඇමරිකා එක්සත් ජනපදයේ ක්‍රියාකාරීත්වය සම්බන්ධයෙන් පසුගියදා විමල් වීරවංශ අමාත්‍යවරයා සිදුකළ ප්‍රකාශය රජයේ නිල ස්ථාවරය නොවන බව කැබිනට් ප්‍රකාශක, අමාත්‍ය කෙහෙළිය රඹුක්වැල්ල මහතා ඊයේ(07) ප්‍රකාශ කළේය.
එමෙන්ම වීරවංශ ඇමතිවරයාගේ ප්‍රකාශය සම්බන්ධයෙන් ඔහුගෙන් කරුණු විමසීමටද ආණ්ඩු පක්ෂය තීරණය කර ඇති බව එහිදී රඹුක්වැල්ල මහතා ප්‍රකාශ කළේය. ඔහු මෙම අදහස් පළ කළේ ඊයේ පැවැති කැබිනට් තීරණ දැනුම්දීමේ මාධ්‍ය සාකච්ඡාවේදී මාධ්‍යවේදීන් නැගූ ප්‍රශ්නයකට පිළිතුරු දෙමිනි.
පසුගිය 04 වැනිදා ත්‍රිකුණාමලයේ පැවති ජාතික නිදහස් දින සැමරුමේදී විමල්වීරවංශ මහතා ප්‍රකාශ කළේ ඇමරිකා එක්සත් ජනපදය ශ්‍රී ලංකාව අස්ථාවර කිරීමේ මෙහෙයුමක් දියත් කරමින් සිටින බවයි.
එහිදී අදහස් දැක්වූ වීරවංශ මහතා, "ලබන මාර්තුවේ ජිනීවා වලට ඇමරිකා එක්සත් ජනපදය මේ රටට විරුද්ධව යෝජනාවක් ගෙන එන්න හදන්නේ. කොළඹ ඇමරිකානු තානාපති කාර්යාලය ශ්‍රී ලංකාවේ ඇතැම් රාජ්‍ය නොවන සංවිධාන ( N G O ) වලට සල්ලි ලබාදෙන්නේ ඒ මෙහෙයුම නිසයි. N G O ආයතන වලට සල්ලි දීලා මේ රටේ එක එක ප්‍රදේශවල කැරළි කෝලහල ඇති කරන්න හදනවා. එක පාරකට ගොවියන් අල්ලගන්නවා. එක පාරකට කම්කරුවන් අල්ල ගන්නවා. මේ ඇමරිකානු තානාපති කාර්යාලයේ සල්ලිවල බලය තමයි. ඔවුන් බලන්නේ කොහොම හරි මේ රට අස්ථාවර කරන්නයි. එහෙම අස්ථාවර කරලා උන්නැහෙලා කියන විදිහට වැඩ කරන නායකයෙක් පත් කරන්නයි මේ හදන්නේ." යැයි පැවසීය.
[බර්ටි රම්යප්‍රියගෙන් උපුටා ගන්න ලද ලිපියකි]
0 අදහස්:
Post a Comment